Првите десет години се најтешки, е мислење што често се слуша меѓу народот, а сѐ понатаму е песна. Да бидеме искрени – нам и овие десет години ни беа како песна. Затоа со огромна радост ќе го пречекаме 27 март 2022 година и на Светскиот ден на театарот ќе влеземе во втората деценија на Театар Комедија.

“Во нашиот театар има нешто помалку од 340 седишта и се многу попримамливи и барани, и тие се, всушност, жешките точки во нашиот театар. Столчињата на современите раководители се само фигуративна назнака и претпоставувам дека новите генерации раководители ќе се плашат од „седнување“ на столчето и брзо ќе го фатат динамичниот ритам на работа. Столот како дизајн го заробува телото во неприродна позиција, а човекот треба да се движи. Без еснафски однос, без почитување на работното место и колегите, нема напредок. И нема протекции, само професионален пристап кон работата. Театарот е нашата егзистенција. Се надевам секој од колективот, вклучително и мене, ќе си ја гледаме работата, ќе го одделуваме семето од каколот и насмеани ќе дочекуваме публика.” 
Дарко Спасов – Директор на НУ Театар Комедија