Ова е приказна која на прв поглед се занимава со опсесијата за убавина на модерниот човек. Но истражувањето на оваа тема оди длабоко во вивисекција на капитализмот, конзумеризмот и модерниот начин на живеење, неизбежно стигнувајќи до тезата за уништениот индивидуализам. Претставата го прати процесот во кој човековата природа попушта пред притисокот на веќе унифицираните императиви за убавото и грдото, за доброто и лошото, каде неминовно личниот идентитет станува излитено парче облека што треба да се замени со ново, блескаво тукушто произведено парче.