После првата праизведба на авторот Венко Андоновски, За секого има по една, Театар Комедија ја повтори соработката со овој познат македонски драматург. 

Овој пат се работи за Господарот на кукавицата, комедија во која старецот Никодим од Галичник, никако да умре, па затоа синот Серафим и внукот Херувим сакат да се ослободат од него и го носат во старечки дом во Скопје, па откако од медицинскиот персонал на домот дознаваат дека татко им наместо измет исфрла танзанит, скапoцен камен, го грабнуваат од домот и си го враќаат во Галичник. 

Но дали е тоа навистина танзанит, каква е цената што треба да ги платат среброљубието и жедта за власт, од каде африканец во Галичник и кој е господарот на кукавицата од цезиумскиот часовник на Европа, клучот е во итроштините на старецот Никодим.

Господарот на кукавицата е „сериозна“ комедија со голема мера на апсурдни ситуации, каде се кршат копјата меѓу народните вредности, скромноста, послушанието од една страна и од друга страна глобализацијата со сите нејзини маани и недоследности. Во домот на дедо Никодим или традицијата мака мачи со новоиспилената глобализација, или пак, таа – глобализацијата не може да им го пофати крајот на нашите традиционални семејни вредности.